von Josef Baumann

Dr Emil Gutzwiller, Friedensrichter z'Därwill - mi Tante Trini isch bi-n-em Huushältere gsi - het mir vill us de alte Zite verzellt. Do dr-mit het er d'Liebi zu dr Gschicht in mr gweckt. Es isch als schön gsi, bi dene alte Lütli uf dr Chunscht d'sitze und zue z'loose. Dr Vetter Emil, so heimer-em gseit, het en Erchlärig gwüsst, wie d'Näme vo eysere Dörfer entstande si.

En alemannische Sippeältischt heb si Siedlig dert zwische Oberwill und Därwill gha, wo jetz no dr Flurname Wilmatt isch. Si heb eifach "Wil" gheisse. Er heigi ringsume an de schönschte Ort Höf gründet, wo spöter zu Dörfer worde sige. Vor em Tod heb er sini Söhn lo zue sich cho. Er heb die Höf und Dörfli welle verteile, d'Söhn hebe dörfe wehle.

Dr eltscht heb gseit: "Dä dert will i", Därwill - Therwil. Dr ander: "Dr ober will i", Oberwill - Oberwil. Dr dritt: "Dr neu will i", Neuwill - Neuwiller. Dr viert: "Dr witer will i", Witterschwill - Witterswil. Und dr jüngst sig e ganze brave gsi und heb gseit: "Go bätte will i", er sig drno uff Bättwil zoge.
Und eso sige eyseri Dörfer zu ihre Näme cho.